دچَشا تو هَر چی بَنیسِم کَمَه
مِه وِ تَش بِریقِ چَشِت دِل دَمَه
 
یِه برقی دِ مینِ چَشِت می زِنَه
کِه آساریانِه دِ جا می کِنَه
 
مِری روزِ خَلقِت خدا خُوش بیَه
کِه آسارَه مینِ چَشِت کَشیَه
 
چِنُو دو چَشِت ناز ها مینِشُو
کِه قُفلِن همیشه چَشامِه وِشُو
 
خدا ریتِه سی جَنگِ اَفتاو کَشی
زلالی و پاکیتِه چی آو کَشی
 
تو کِه می خَنی آسِمو می خَنَه
خدا دَر وِ هَر چی غَمَه می وَنَه
 
وِ اَخمِ تو هفت آسِمو تار مو
سِتینِ دِلُ عشقم آوار مو
 
بِهارُو هِه ویرات جُومِه تُونَه
دِ شُوقِ تو هَر چی گُلَه دَس دِنَه
 
تو نُومِت بِهارَه،هِناسَه ت بِهار
دِ عشقِ تو کُلِ زِمی بی قِرار
 
تو دو چَشِ کالِت خدایی می کَن
زِمین و زِمونِه هِوایی می کَن
 
دِ مُشتِم دِراُومایَه بازارِ خُوم
کِه دِرمَنِمَه سی تو دِ کارِ خُوم
 
وِ هَر لایی کِه سیل بَکِم تُونی
وِ سیکِ چَشی جُونِمِ می سُونی
 
هِناسَه م دِ نُومِ تُو ها وِ جا
وِ نُومِت قِسَم،بی تو هیچِم،بیا